Páskafrí framundan og Akureyrarferð eftir páska

Nú er síðasti skóladagurinn fyrir páskafrí að renna sitt skeið. Við starfsfólkið erum þakklát fyrir hve skólastarfið hefur gengið vel undanfarnar vikur þrátt fyrir að ýmsar pestir hafi herjað á okkur og það er í raun ótrúlega mikil gæfa að allir nemendur skólans skuli hafa getað tekið þátt í frábærlega vel heppnaðri árshátíð fyrir réttri viku síðan.
Nú er vorið handan við hornið og það er alltaf tilhlökkunarefni en auk þess er ýmislegt á döfinni sem flokkast getur sem uppbrot á hefðbundnu skólastarfi. Þar ber hæst að við stefnum á að drífa okkur í Akureyrarferðina langþráðu í lok apríl. Við frestuðum henni í janúar vegna samkomutakmarkana en nú er vonandi komin betri tíð með blóm í haga. Stefnt er að því að keyra norður fimmtudagsmorguninn 28. apríl og koma heim seinni part föstudags. Við eigum bókaða gistingu á Backpakers og gert er ráð fyrir að a.m.k annað foreldri fylgi nemendum í 1.-5. bekk í ferðina. Nánara skipulag ferðarinnar verður kynnt þegar nær dregur.

Ég minni að lokum á að fyrsti skóladagurinn eftir páskafrí er þriðjudagurinn 19. apríl og því sögðu vil ég fyrir hönd starfsfólks Brúarásskóla óska ykkur öllum gleðilegra páska.

ÁIA